Estremeñu

Coletivus LGBTI pola Renta Básica Universal

Esti 2020 enfrentamus el Ergullu LGBTI en una sitación d’esceción. Por mó dela urgencia sanitaria dimaná dela pandemia mundial COVID-19 á estrumpíu con huerça una crisi social i económica sin antecedentis. Vemus cómu esta crisi tripli obrigó a atortal la economía doranti mesis pa afial i favorecel la vida, i assestimus al prencipiu del farrungamientu de pilaris emportantis que sostriban el neoliberalismu, en favol delo común, valoreandu lo púbricu i la solidaridá. La pandemia arrumbó la creyencia de que la única horma possibli i legítima d’acedel a recussus económicus es el empreu pagu: medías comu los ERTEs o l’Engressu Mínimu Vital an desatillau una cosa dela sotra. Sin embargu, al tiempu, sotru haci de genti queava desafiá i espuesta al cael las basis dela su gandalla i no poel acedel a estas ayúas.

Comu movimientu LGBTI, sempri amus vindicau el nuestru derechu a sel i essestil. Esti hue el nuestru lema ena primel manifestación del Ergullu, en Barcelona, nel añu 1977. Sin embargu, esti sistema capitalista atillau ala injusticia de contau, no assegura la nuestra essestencia en condicionis de dinidá. En angunus paísis, de hechu, ni siquiá se seguran las nuestras vidas: la pena de muerti palas pessonas LGBTI, la esperança de vida delas mugeris trans en América Latina (en tornu alos 35 añus) o delas pessonas LGBTI nel andal mundial (44 añus), sonin angunus exemprus que lo prevan.

Nel ambienti d’urgencia social gravá dela crisi del COVID, se multiplican las pessonas que no s’án poíu acogel a ERTEs o ayúas socialis por sel trebajaoras en negru i/o no tenel la possibilidá de cumpril sotras enconvencias amenistrativas. Cabi el mental el casu del 85% del coletivu trans que adoleci parola estrutural viendu-si una tupa vezis empurrau ala prostitución. Es el casu tamién de tolas pessonas migrantis LGBTI que s’encuentran en sitación d’“inregularidá” legal i repuntamientu social. Es el casu de tolas pessonas que án síu empuntás delos sus trebajus, obrigás de sitacionis de descriminación LGBTIfóbica, o que án acontinau en ellus en viendu-si abocás a hondeal el su tiraeru sessual o dentiá de géneru (6 de ca 10 pessonas LGBTI en España). Es el casu de pessonas nuevas que, no puiendu emancipal-si, tienin de vivil en casa ondi no se les respeta, o delas menoris LGBTI, que s’án vistu embrocás a passal el ençonchamientu con familias LGBTIfóbicas i que, ara, se ven descruías de medías comu l’Engressu Mínimu Vital. I es que, de contau, no poemus premitil que naidi se quei patrás, el coletivu LGBTI tapocu.

Por ellu, creyemus que es la ora de, comu movimientu LGBTI, recramal esta medía que asseguri el tenel las nuestras precisas básicas cubiertas. No las nuestras namás, sino las de tola puebración; hiziendu-la aziamenti faci pa mugeris, menoris i coletivus socialis. Una Renta Básica, tamién con una vista crara de géneru comu an vindicau collaças del movimientu feminista, que seguri lo precisu pal sustén dela vida, que mos aliberi tiempu pa poel acontinal a desenroal las nuestras vidas, i que sea endividual, universal i incondicional. La operación d’urgencia d’esta medía no mos assegurava liquiamenti un techu i gandalla, sino que tamién la possibilidá d’aterminal sitacionis de descriminación lavoral LGBTIfóbicas, de salil de sitacionis de violencia nel ambienti familial o de violencia intragéneru nel dela pareja i de no tenel d’aguantal condicionis lavoralis abusivas, precarias o inominosas por mieu a sel empuntás o desechás económica i socialmenti. No ai Ergullu si ai esplotiju.

Mos ajuntamus, por tantu, alas vozis que recraman que esta Renta Básica Universal no tenga essus travancus, que inviertin las Rentas Mínimas d’angunus territorius en carreras d’estáculus, ni el sesgu familiucéntricu que toma la uniá de convivencia comu referencia, descaleciendu-si delas relacionis de poel desigualis que sufrimus las pessonas LGBTI. Es reondamenti nesseciariu que esta nuversalidá sea ralidosa, sin criterius de repuntamientu, pa que s’allegui a toas, tamién alas pessonas migrantis. Amus a repartil la riqueza pa entangal un mundu más justu, feminista i divessu!

Por justicia social, solidaridá, derechu ala essestencia i luchi contra las descriminacionis: Renta Básica Universal!


¡Adhiérete al manifiesto!:


Si quieres hablar de este manifiesto en redes sociales, te animamos a usar el hashtag #LGBTIxRBU

Para dudas o contacto: lgbtixrbu@gmail.com

A %d blogueros les gusta esto: