Esti 2020 encaramos l’Arguyu LGBTI nuna situación d’esceicionalidá. A raíz de la emerxencia sanitaria derivada del andanciu mundial COVID-19, españó con fuercia una crisis social y económica ensin precedentes. Presenciáremos cómo esta crisis triple obligara a paralizar la economía dellos meses pa protexer y priorizar la vida, y asistiéremos al entamu l’esbarrumbe d’importantes pilares que sofiten el neolliberalismu, en favor de lo común, poniendo en valir lo público y la solidaridá. L’andanciu desmontó la creyencia de que l’únicu xeitu posible y llexítimu de consiguir recursos económicos ye l’emplegu asalariáu: midíes como los ERTEs o l’Ingresu Mínimu Vital deslligaron una cosa de la otra. Sicasí, al mesmu tiempu, muncha xente quedaba desprotexío y espuesto al cayer les bases del so sustentu y nun ser quien a algamar estes aídes.
Como movimientu LGBTI, siempre reivindicamos el derechu de nueso a ser y a esistir. Esti fuere’l nuesu lema na primera manifestación del Arguyu, en Barcelona nel añu 1977. Sicasí, esti sistema capitalista intrínsecamente lligáu a la inxusticia, nun garantiza la nuesa esistencia en condiciones de dignidá. En dellos países, de fechu, nin siquier tan segures les nueses vides: la pena capital pa les persones LGBTI, la esperanza vida les muyeres «trans» d’América Llatina (sobre los 35 años) o de les persones LGBTI a nivel mundial (44 años), son dellos exemplos que lo prueben.
Nel contestu d’emerxencia social, agravada pola crisis del COVID, multiplícáronse les persones que nun se pudieron acoyer a ERTEs o aídes sociales por ser trabayadores en B y/o nun tener la posibilidá de cumplir otros requisitos alministrativos. Cabe citar el casu del 85% del colectivu «trans» que carez paru estructural, viéndose en munches ocasiones abocáu a la prostitución. Ye’l casu tamién de toles persones migrantes LGBTI que s’alcuentren en situación d’ “irregularidá” llegal y esclusión social. Ye’l casu de toles persones que foron espulsaes de los sos trabayos por situaciones de discriminación LGBTIfóbica, o que continuaron nellos viéndose obligaes a esconder la so orientación sexual o identidá de xéneru (6 de cada 10 persones LGBTI n’España). Ye’l casu de la mocedá qu’al nun ser a emancipase, tienen que vivir nun llar au nun se-yos respeta, o de les menores LGBTI que se vieron obligaes a pasar el confinamientu con families LGBTIfóbiques y qu’agora, vense escluyíes de midíes como l’Ingresu Mínimu Vital. Y ye que, de fechu, nun podemos permitir que naide quede atrás, tampoco’l colectivu LGBTI.
Por ello, creyemos que ye la hora de que, como movimientu LGBTI, reclamemos esta midida que garantice tener les nueses necesidaes básiques cubiertes. Non solo les de nueso, sinón les del conxuntu la población; faciéndola n’especial algamable pa muyeres, menores y colectivos sociales. Una Renta Básica, tamién con una nidia perspeutiva de xéneru como reivindicaron collacies del movimientu feminista, que garantice lo necesario pal caltenimientu de la vida, que nos llibere tiempu pa poder siguir realizando les vides de nueso, y que seya individual, universal ya incondicional. La implementación d’urxencia d’esta midida non solo nos garantizaría techu y alimentu, sinón tamién la posibilidá d’acabar con situaciones de discriminación llaboral LGBTIfóbicas, de salir de situaciones de violencia nel ámbitu familiar o de violencia intraxéneru nel de la pareya, y de nun tener que soportar condiciones llaborales abusives, precaries o denigrantes por mieu a ser despedíes o escluyíes económica y socialmente. Nun hai Arguyu si tamos esplotaes.
Xunímonos, poro, a les voces que reclamen qu’esta Renta Básica Universal nun tenga les torges burocrátiques que tornen les Rentes Mínimes de dellos territorios nun camín d’artos, nin el sesgu familiocéntricu que toma la unidá de convivencia como referencia, salvando les rellaciones de poder desiguales que sufrimos les persones LGBTI. Ye dafechu necesario qu’esta universalidá seya real, ensin criterios d’esclusión, pa qu’aporte a toes, tamién a les persones migrantes. ¡Redistribuyamos la bayura pa construyir un mundiu más xustu, feminista y diversu!
Por xusticia social, solidaridá, derechu a la esistencia, y llucha escontra les discriminaciones: ¡Renta Básica Universal!
¡Adhiérete al manifiesto!:
Manifiesto LGBTI por una Renta Básica Universal 